早前我哋同勇士冬梅 感足．Feet My Soul 去到將軍澳基督教宣道會宣基小學，由冬梅分享自己生命同生活中面對嘅困難，以及解決嘅方法，希望從冬梅嘅經歷鼓勵同學仔勇於面對困難，唔好輕易放棄。

冬梅自小患上痙攣，語言同埋雙手活動能力受損，只有左腳比較容易控制，冬梅平日都係用左腳代替雙手，包括用腳寫字同埋畫畫。畫畫係冬梅嘅興趣，用腳畫畫比起用手係非常困難，因為手有手腕但腳無腳腕，但冬梅無放棄，仲出咗本畫集鼓勵其他人唔好放棄呀！

係分享嘅時候，冬梅示範用腳寫字，同學仔睇到冬梅用腳寫字紛紛拍手，老師同同學仔睇到冬梅寫「恩典豐厚」嘅時候，都覺得好感動，而呢四個字係呢一個學年都會貼係每個課室，提醒同學仔唔好咁易放棄。

當日老師叫同學仔返到屋企後試吓用腳寫自己個名，第二日帶返學校做分享，同學仔有好深嘅感受，覺得原來係生活中好容易完成嘅事，係其他人嘅生活入面未必係一件易事。

今年學校嘅主題係讓世界變得更美好，相信同學仔係冬梅嘅分享入面有好深嘅感受，希望同學仔可以學習冬梅永不放棄嘅精神，讓世界變得更好。